వాళ్లు యాక్టివ్ అయ్యారు..ఇక కావాల్సింది మీరే..!

టైటిల్ ఎందుకు ఇలా ఉంది..అంత నిజమేనా… అని డౌట్ ఇప్పటికే వచ్చి ఉంటది కదా..అవును మీ అనుమానం నిజం.ఒక్క కాల్ తో వంద కోట్లు మీకు రావు.జనం మీద పడి పందికొక్కులా మేసిన లంచగొండుల లాకర్లు బయటపడతాయి.. ఈ మధ్య ఏసీబీ ఎవరిని ముట్టినా కోట్లు రాలుతున్నాయి..

లక్షల్లో లంచాలు.. కోట్లలో అక్రమాస్తులు! అధికారుల్లో కొందరి అవినీతి బాగోతాలు బయటపెడుతున్న ఏసీబీ. నిత్యం ఇవే హెడ్లైన్స్ చూస్తున్నారు ..మరి ప్రజలు ఎప్పుడు మేలుకుంటారు? లంచం ఇవ్వడం ఆపితేనే అవినీతికి అడ్డుకట్ట పడుతుందా?

తెలంగాణలో అవినీతి నిరోధక శాఖ (ఏసీబీ) దూకుడు పెంచింది. అవినీతి అధికారులపై వరుస దాడులు చేస్తూ లంచగొండి వ్యవస్థలో ప్రకంపనలు సృష్టిస్తోంది. చిన్న స్థాయి ఉద్యోగుల నుంచి ఉన్నతాధికారుల వరకు ఎవరినీ వదలకుండా తనిఖీలు నిర్వహిస్తోంది. లంచం తీసుకుంటూ పట్టుబడుతున్న అధికారులు ఒకవైపు.. అక్రమాస్తుల వ్యవహారాల్లో చిక్కుకుంటున్న ఉద్యోగులు మరోవైపు. మొత్తంగా తెలంగాణలో ఏసీబీ పేరు ఇప్పుడు అవినీతి అధికారులకు హెచ్చరికగా మారింది.

ఒకప్పుడు లంచం అంటే వెయ్యి, ఐదువేలు, పదివేలు.. మహా అయితే లక్ష రూపాయలు. కానీ ఇప్పుడు కొన్ని వ్యవహారాల్లో లక్షలు, కోట్ల రూపాయల డీల్స్ తెరపైకి వస్తున్నాయి. ఇటీవల అబ్దుల్లాపూర్‌మెట్ ఎమ్మార్వో కార్యాలయానికి సంబంధించిన లంచం వ్యవహారంలో రూ.34 లక్షలు తీసుకుంటూ పట్టుబడిన ఘటన తీవ్ర చర్చనీయాంశమైంది. మొత్తం డీల్ విలువ దాదాపు కోటి రూపాయలుగా ప్రచారం కావడం అధికారుల అవినీతి ఏ స్థాయికి చేరిందనే ప్రశ్నలను లేవనెత్తింది.

ఇక మరోవైపు ఏసీబీ సోదాల్లో కొందరు అధికారుల వద్ద భారీగా అక్రమాస్తులు బయటపడుతున్నాయి. బహుళ అంతస్తుల భవనాలు, భూములు, ఇతర ఆస్తుల వ్యవహారాలు వెలుగులోకి వస్తున్నాయి. ప్రభుత్వ ఉద్యోగం చేస్తూ ఇంతటి సంపద ఎలా సంపాదించారనే ప్రశ్నలు తలెత్తుతున్నాయి.

మూడు లక్షల బిల్లుకు లక్ష రూపాయల లంచమా?

తాజాగా మరో లంచం వ్యవహారం చర్చకు వచ్చింది. మహబూబ్ నగర్ లో స్పోర్ట్స్ ఆఫీసర్..క్యాటరింగ్ బిల్లు చెల్లించేందుకు రూ.3.10 లక్షల బిల్లులో రూ.లక్ష లంచం అడిగినట్లు ఆరోపణలు వచ్చాయి. అంటే బిల్లులో దాదాపు మూడో వంతు లంచం అడిగినట్టే!

అసలు ఇదేం పద్ధతి? ప్రజాధనంతో జీతాలు తీసుకుంటున్న అధికారులు ప్రజల పనులు చేయడానికి కూడా లంచాలు అడగడం ఎంతవరకు సమంజసం? ప్రభుత్వ నిబంధనల ప్రకారం చేయాల్సిన పనికి అదనంగా డబ్బులు ఎందుకు చెల్లించాలి?

ఏ శాఖలో చూసినా ఇదే పరిస్థితా?

రెవెన్యూ శాఖలో భూముల రికార్డులు, రిజిస్ట్రేషన్లు, ఇతర సేవల కోసం ప్రజలు ఇబ్బందులు పడుతున్నారనే ఫిర్యాదులు తరచూ వినిపిస్తుంటాయి. పోలీసు శాఖలోనూ కొన్ని అవినీతి ఆరోపణలు వెలుగులోకి వస్తుంటాయి. పంచాయతీరాజ్ సహా ఇతర ప్రభుత్వ శాఖల్లోనూ లంచాల ఆరోపణలు కొత్తేమీ కాదు.

అయితే అందరు అధికారులు అవినీతిపరులే అని చెప్పలేం. నిజాయితీగా పనిచేస్తున్న ఉద్యోగులు కూడా ఉన్నారు. కానీ కొందరి వ్యవహారాలు మొత్తం ప్రభుత్వ వ్యవస్థ ప్రతిష్ఠను దెబ్బతీస్తున్నాయి.

ప్రజలు కూడా మారాల్సిన సమయం వచ్చింది!

ఇక్కడ ఒక ముఖ్యమైన ప్రశ్న ఉంది. లంచం అడిగే అధికారులనే ప్రశ్నిస్తే సరిపోతుందా? ప్రజలు కూడా తమ బాధ్యతను గుర్తించాల్సిన అవసరం లేదా?

ఒక అధికారి లంచం అడిగితే ఎందుకు ఇవ్వాలి? మనకు న్యాయబద్ధంగా రావాల్సిన సేవను పొందేందుకు అదనపు డబ్బులు ఎందుకు చెల్లించాలి? ఫైల్‌ను కావాలనే పెండింగ్‌లో పెట్టి, చివరకు విసిగిపోయిన ప్రజలతో లంచం ఇప్పించే పరిస్థితులకు ఎందుకు తలవంచాలి?

కొన్నిసార్లు దరఖాస్తుల్లో లోపాలు ఉండవచ్చు. పత్రాలు సరిగా లేకపోవచ్చు. అలాంటప్పుడు ఏ పత్రం కావాలో, ఏ నిబంధన ప్రకారం పని ఆగిందో అధికారి స్పష్టంగా చెప్పాలి. కానీ పని చేయకుండా తిప్పించడం, మధ్యవర్తుల ద్వారా డబ్బులు అడగడం మాత్రం సమర్థనీయం కాదు.

ఏసీబీకి ఫిర్యాదు చేయండి.. భయపడాల్సిన అవసరం లేదు!

తెలంగాణ ఏసీబీ అవినీతి నిరోధక చర్యల్లో భాగంగా ప్రజలకు ఫిర్యాదు చేసే అవకాశం కల్పిస్తోంది. లంచం అడిగితే మౌనంగా ఉండకుండా అధికారిక మార్గాల్లో ఫిర్యాదు చేయాలి.

ఏసీబీ టోల్ ఫ్రీ నంబర్ 1064. లంచం అడిగిన సందర్భంలో ఈ నంబర్‌కు ఫిర్యాదు చేయవచ్చు. ఫిర్యాదు చేసే ముందు సంబంధిత అధికారుల సూచనలు తీసుకోవాలి. స్వయంగా లంచం ఇచ్చి పట్టుకునే ప్రయత్నాలు చేయకుండా, ఏసీబీ సూచించిన విధానాన్నే అనుసరించాలి.

సోషల్ మీడియా కంటే చట్టపరమైన పోరాటమే ముఖ్యం!

ప్రజల చేతిలో ఇప్పుడు సోషల్ మీడియా కూడా ఒక శక్తివంతమైన సాధనం. అయితే సరైన ఆధారాలు లేకుండా వ్యక్తులపై ఆరోపణలు చేయడం, నిర్ధారణ కాని విషయాలను ప్రచారం చేయడం వల్ల ఇబ్బందులు ఎదురయ్యే అవకాశం ఉంది. అందుకే ముందుగా ఏసీబీకి, సంబంధిత అధికారిక వ్యవస్థలకు ఫిర్యాదు చేయాలి. ఫిర్యాదుపై స్పందన లేకపోతే చట్టబద్ధమైన మార్గాల్లో తదుపరి చర్యలు తీసుకోవాలి.

అవినీతి పోవాలంటే మార్పు ఎక్కడ మొదలవ్వాలి?

స్వాతంత్ర్యం వచ్చి దశాబ్దాలు గడిచినా అవినీతి సమస్య ఇంకా కొనసాగుతూనే ఉంది. ప్రభుత్వాలు మారుతున్నాయి. అధికారులు మారుతున్నారు. నిబంధనలు మారుతున్నాయి. అయినా కొన్ని చోట్ల లంచాల సంస్కృతి మాత్రం కొనసాగుతోంది.

ఏసీబీ దాడులు చేయడం ఒక్కటే పరిష్కారం కాదు. అవినీతికి పాల్పడిన వారిపై చట్ట ప్రకారం చర్యలు తీసుకోవాలి. ప్రభుత్వ కార్యాలయాల్లో సేవలకు గడువులు అమలు చేయాలి. ఫైళ్లు ఎందుకు పెండింగ్‌లో ఉన్నాయో ప్రజలకు తెలిసేలా పారదర్శకత పెంచాలి.

అదే సమయంలో ప్రజలు కూడా లంచం ఇవ్వడాన్ని సాధారణ విషయంగా భావించడం మానేయాలి.

ఏసీబీ యాక్టివ్ అయింది.. ఇప్పుడు ప్రజలు కూడా యాక్టివ్ కావాలి. లంచం అడిగితే ప్రశ్నించాలి. ఫిర్యాదు చేయాలి. న్యాయబద్ధంగా మనకు రావాల్సిన సేవ కోసం పోరాడాలి.

అధికారులు ప్రజలకు సేవ చేయడానికి ఉన్నారు కానీ ప్రజలు అధికారులకు సేవ చేయడానికి కాదు. జీతాలు తీసుకుంటున్న ఉద్యోగులు తమ బాధ్యతను గుర్తించాలి. ప్రజలు తమ హక్కులను గుర్తించాలి.

లంచం తీసుకునే అధికారి పదిసార్లు ఆలోచించే పరిస్థితి రావాలి. లంచం ఇవ్వాలనుకునే ప్రజలు కూడా ఒకటికి రెండుసార్లు ఆలోచించాలి.

అవినీతి అనే చెట్టును నరికేయాలంటే ఏసీబీ గొడ్డలి ఒక్కటే సరిపోదు.. ప్రజల్లో చైతన్యం అనే గొడ్డలి తోడు అవ్వాలి.. పైసలు ఇస్తే పని అవుతుందిలే అనే రోజులు పోవాలి..ప్రశ్నించక ముందే సర్కార్ పనులు చేసే రోజులు రావాలి…