UPI వినియోగదారులకు షాక్.. ₹2,000 దాటితే 0.4% ఫీజు?

ఎటొచ్చీ మళ్ళీ మనకే బొక్కా..!

న్యూఢిల్లీ: UPI ద్వారా చెల్లింపులు చేసే వినియోగదారులకు ప్రస్తుతం ఎలాంటి ఛార్జీలు లేకపోయినా.. వ్యాపారులకు మాత్రం కొత్త ఫీజు విధానం రానున్నట్లు వార్తలు వస్తున్నాయి. ₹2,000 కంటే ఎక్కువ మొత్తాన్ని వ్యాపారులకు UPI ద్వారా చెల్లిస్తే 0.4 శాతం వరకు ఫీజు విధించే ప్రతిపాదన తెరపైకి వచ్చింది.

అయితే ఈ ఛార్జీని వినియోగదారుల నుంచి నేరుగా వసూలు చేయరని సమాచారం. అంటే సాధారణంగా మనం UPI యాప్ ద్వారా చేసే చెల్లింపులకు అదనపు ఛార్జీ ఉండదు.

ఎవరు చెల్లించాలి?

₹2,000 కంటే ఎక్కువ మొత్తానికి వ్యాపారులకు చేసే UPI లావాదేవీలపై 0.4% ఫీజు విధించే ప్రతిపాదన వ్యాపారుల వైపు వర్తించనుంది. ముఖ్యంగా పెద్ద మొత్తంలో జరిగే వ్యాపార లావాదేవీలపై ఈ ప్రభావం ఉండొచ్చు.

ఉదాహరణకు.. ₹5,000 విలువైన వస్తువును UPI ద్వారా కొనుగోలు చేస్తే, 0.4% ఫీజు ప్రకారం ₹20 అవుతుంది. అయితే ఈ ఫీజును ఎవరు భరిస్తారు, ఏ లావాదేవీలకు ఖచ్చితంగా వర్తిస్తుంది అనే అంశాలపై స్పష్టమైన నిబంధనలు అవసరం.

వినియోగదారులకు UPI ఫ్రీగానేనా?

ప్రస్తుతం అందుబాటులో ఉన్న సమాచార ప్రకారం వ్యక్తిగత వినియోగదారుల UPI చెల్లింపులు ఉచితంగానే కొనసాగుతాయి. అంటే స్నేహితులకు డబ్బులు పంపడం, కుటుంబ సభ్యులకు పంపడం వంటి సాధారణ UPI లావాదేవీలపై ఈ ఫీజు వర్తించదు.

అయితే వ్యాపారులకు చేసే పెద్ద మొత్తాల చెల్లింపుల విషయంలో కొత్త ఛార్జీల ప్రతిపాదన చర్చకు రావడం ఇప్పుడు ఆసక్తికరంగా మారింది.

మొత్తంగా చూస్తే.. UPI వినియోగదారులకు ఫ్రీగానే ఉన్నప్పటికీ, ₹2,000 దాటిన వ్యాపార చెల్లింపులపై 0.4% ఫీజు విధించే అంశం ఇప్పుడు చర్చనీయాంశంగా మారింది.