తింటే చావే…
బిర్యానీ పేరుతో కుళ్లిన మాంసం.. హైదరాబాద్ హోటళ్లలో అసలు ఏం జరుగుతోంది?
హైదరాబాద్లో బిర్యానీ అంటే ప్రాణం పెట్టే వాళ్లు చాలామందే ఉంటారు. చికెన్ బిర్యానీ అయినా.. మటన్ బిర్యానీ అయినా.. ప్లేట్ కోసం వందలు ఖర్చు చేయడానికి వెనకాడరు.
కానీ ఒక్కసారి ఆలోచించండి…
మీరు తింటున్న ఆ బిర్యానీలో వేసే చికెన్ లేదా మటన్ తాజాగా ఉందా?
లేదా రోజులు గడిచిపోయిన మాంసాన్నే మసాలాల్లో కలిపి.. బిర్యానీ పేరుతో మీకు వడ్డిస్తున్నారా?
ఇటీవల హైదరాబాద్లో ఫుడ్ సేఫ్టీ అధికారుల తనిఖీల్లో బయటపడుతున్న విషయాలు చూస్తే ఈ ప్రశ్న రావడం సహజమే.
తాజాగా దిల్సుఖ్నగర్లోని బహార్ బిర్యానీ కేఫ్లో తనిఖీలు చేయగా కుళ్లిపోయిన, పాత మాంసం భారీగా బయటపడింది. చికెన్, మటన్, రొయ్యలు కూడా ఇందులో ఉన్నట్లు అధికారులు గుర్తించారు.
ఇది ఒక్క బహార్ బిర్యానీ కేఫ్ కథే కాదు.
హైదరాబాద్లోని పలు హోటళ్లు, రెస్టారెంట్లు, మెస్లపై జరిగిన తనిఖీల్లో కూడా కుళ్లిన మాంసం, గడువు ముగిసిన పదార్థాలు, అపరిశుభ్రమైన వంటగదులు, సరైన స్టోరేజ్ లేకపోవడం వంటి ఉల్లంఘనలు బయటపడ్డాయి.
కొన్ని చోట్ల ఫ్రిజ్ల్లో రోజులు గడిచిన మాంసం.. మరికొన్ని చోట్ల ఉపయోగించడానికి పనికిరాని పదార్థాలు కనిపించాయి.
అసలు ప్రశ్న ఏంటంటే…
ఫుడ్ సేఫ్టీ అధికారులు తనిఖీలు చేస్తున్నా కొన్ని హోటళ్లు ఎందుకు మారడం లేదు?
కస్టమర్ల నుంచి ఒక ప్లేట్ బిర్యానీకి వందలు, వందల రూపాయలు వసూలు చేస్తున్నారు. మరి అందుకు తగ్గట్టుగా నాణ్యమైన, తాజా పదార్థాలు ఉపయోగించాల్సిన బాధ్యత లేదా?
కస్టమర్ హోటల్కి వెళ్లేది ఆకలి తీర్చుకోవడానికి. అనారోగ్యం తెచ్చుకోవడానికి కాదు.
ఇంకో విషయం…
హోటల్ బయట మెరిసిపోయే బోర్డు, లోపల అందంగా కనిపించే టేబుళ్లు చూసి ఆహారం కూడా నాణ్యమైనదే అని అనుకోవడం తప్పు. వంటగదిలో పరిశుభ్రత ఎలా ఉంది? మాంసాన్ని ఎలా నిల్వ చేస్తున్నారు? పాత స్టాక్ను ఎలా నిర్వహిస్తున్నారు? ఇవే అసలు విషయాలు.
మరి బిర్యానీ ప్రియులు ఏం చేయాలి?
ఆహారంలో వాసన, రుచి లేదా నాణ్యతపై అనుమానం వస్తే తినకండి. బిల్లు తీసుకోండి. సాధ్యమైతే ఫుడ్ ఫొటోలు తీసి పెట్టుకోండి. సమస్య ఉంటే సంబంధిత ఫుడ్ సేఫ్టీ అధికారులకు ఫిర్యాదు చేయండి.
ఎందుకంటే ఒక్క కస్టమర్ ఫిర్యాదు కూడా ఒక హోటల్లో జరుగుతున్న నిర్లక్ష్యాన్ని బయటపెట్టే అవకాశం ఉంది.
హైదరాబాద్ బిర్యానీకి ప్రపంచవ్యాప్తంగా పేరుంది.
ఆ పేరును కాపాడాల్సిన బాధ్యత హోటళ్లదే.
బిర్యానీ రుచిగా ఉండటం మాత్రమే కాదు…
అది సురక్షితంగా కూడా ఉండాలి.
కస్టమర్ డబ్బులు తీసుకునేటప్పుడు మాత్రం ఫుల్ బిర్యానీ..
అదే కస్టమర్ ఆరోగ్యం విషయంలో మాత్రం నిర్లక్ష్యం…
ఇలాంటి పరిస్థితికి ఎప్పటికి చెక్ పడుతుంది?
మీరు బిర్యానీ తినే ముందు హోటల్ కిచెన్ ఎలా ఉందో ఎప్పుడైనా గమనించారా?
